LEMBUR GANDA MANAH CISARUA BOGOR

Kacarioskeun waktos zaman walanda, Raden Gandadirja didamel di markas  walanda. Janten antek-antek penjajah. Tapi nusaleresnamah sanes kitu. Ngadunungan ka Walanda teh mung ukur sandiwara wungkul. Anu saleresnamah anjeuna teh pejuang Indonesia anu teu sudi dijajah ku bangsa deungeun. Sami sareng leluhurna ‘Embah Tubagus Andung Alun-Alun’.

 Tapi Anjeuna ngagaduhan cara anu rada benten tipejuang nu sanesna. Sadidinten anjeuna aya dilingkungan Walanda, tapi waktos prajurit walanda balangah, anjeuna ‘ngabobol’ gudang beas. Beasna dikintun ka para pejuang anu nuju gerilya. ‘ngabobol’ gudang papakean dimana para pejuang butuh papakean dikintunkeun, kitu deui obat-obatan, senjata sareng saniskanten kabutuhan para pejuang Indonesia liana anu nuju gerilya.

Lami ku lami,  Pimpinan walanda waktos harita gaduh rasa curiga. Naha ceunah gudang teh bet ngurangan wae eusina? Padahal jarang dikaluarkeun? Teu saimbang antara kaluar asupna barang  ka gudang. Di selidik di sidik-sidik kapanggih saha nu sok ngabobol gudang. Ana horeng teh Raden Gandadirja putera Raden Ace Alireja. Atuh puguh amuk motah amarah muntah si walanda teh. Langsung Turun parentah “Tangkap Ganda hidup atau mati!” kitu kinten-kintena eta parentah teh. Anu hartosna “Tewak Ganda hirup atawa paeh!”

 Nya puguh Raden Gandadirja teu eleh geleng. Maenya kudu masrahkeun diri ka panjajah? Kapalang kabongkar rusiah geus wae lawan sakalian. Tapi lain lawankeuneun atuh. Pasukan sa batalyon turun kabeh ngepung Raden Gandadirja. Nya ari kitu-kitu teuing mah kabur jadi hiji-hijina jalan. Gajleng wae Raden Gandadirja teh luncat. Lumpat ngajauh tina congo bedil anu jelas-jelas ngancam jiwana.

Pasukan walanda ngudag. “Ganda melarikan diri kearah sanah!” anu hartina “Ganda lumpat kaditu!” kitu ceuk salah saurang anggota pasukan. Atuh puguh kabeh pasukan murubul lalumpatan muru Raden Gandadirja.

Kulantaran waktos udag-udangan rame pisan, barijeung sosorak “Tangkap Ganda! Tangkap Ganda!” ceunah. sakabeh rahayat jelata kasieunan. Bisi jadi salah sasaran. Poko’namah geumpeur wae nu aya. Nu disumur kabur, nu di imah nyumput, nu di kebon nyempod, nu di sawah gareuwah lumpat sakalumpat lampet nyalametkeun diri tina balai.

Raden Gandadirja terus lumpat ngaliwatan kampung, kebon, huma pasawahan…. Dihiji tempat dipasawahan, Raden Gandadirja ngarandeg, ana horeng dihiji kotakan sawah aya tudung cetok jeung pacul katinggaleun. Siganamah bakating ku buru-buru  cul wae ninggakeun tudung cetok jeung pacul. Breh wae aya nukatingali dina pikiran Raden Gandadirja. Tudung cetok dipake pacul dipanggul dekul wae macul dikotakan sawah eta.

Pasukan walanda anu ngudag Raden Gandadirja tepi kadinya. Aya hiji patani anu keur macul di sawah. Pasukan sindang reret  “GANDA MANAH?” ceunah ka nu keur macul. Nu ditanya nunjuk ka tonggoh “Tuh ka ditu?” walerna. Bring deui pasukan teh lalumpatan deui. Patani dekul deui macul.

Pasukan walanda geus jarauh, Patani manggul paculna, ngalengkah ninggalkeun sawah balik ka imah bari imut ngagambarkeun sugemana manah. Dugi ka hiji imah di daerah Gadog, Patani Beberesih tuluy wae ngagoler na bale. Bakating ku cape les teu emut nanaon deui alis tibra.

Kumaha nasib pasukan walanda anu ngudag? Nya putar puter maju mundur ngudag kamana wae oge da moal kapanggih atuh. Nu diudagna dituduhkeun lumpat ka tonggoh padahal balik deui ka lebak terus ngagoler bari ngorok alias tibra. Ceuk barudak ayeunamah “ emang enak dikerjain?”

Tah ayeuna di wanci kiwari, pasawahan sareng daerah sakitarna dimana raden Gandadirja pura-pura macul janten patani katelah lembur SINDANG RERET GANDA MANAH anu danget iyeu mah langkung kawentarna lembur GANDA MANAH di Kecamatan Cisarua Kabupaten Bogor.